متی دی انجیل
باب ۱۲
۱۱۔ اوس ویلے یِسُوع سبت دے دن پیلیاں وچوں دی لنگھیا تے اُہدے شاگرداں نُوں بھکھ لگی ہوئی سی۔ تے اُہ سِٹے توڑ توڑ کے چبن لگے۔
۲۲۔ تے فریسیاں اِہ ویکھ کے اُہنُوں آکھِیا۔ ویکھ تیرے شاگرد اُہ کم پے کردے نے جہڑا سبت نُوں کرنا روانہیں۔
۳۳۔ پر اوس اُہناں نُوں آکھیا تُساں نہیں پڑھیا پئی داؤد نے کیہ کیتا جدوں اُہ تے اُہدے ساتھی بھکھے سان۔
۴۴۔ اُہ کس طرح خدادے گھروچ گیا تے چڑھاوے دِیاں روٹیاں کھادیاں جہڑیاں نہ اُہنُوں نہ اُہدے ساتھیاں نُوں پر نریاں کاہناں نُوں کھانیاں روا سان۔
۵۵۔ یا تساں توریت وچ نہیں پڑھیا پئی کاہن سبت دے دن ہیکل دے وچ سبت نُوں توڑدیندے نے۔
۶۶۔ تے بے دوسے رہندے نے۔ پر میں تُہانُوں آکھنا ہاں پئی ہیکل نالوں ایتھے اک وڈا ہے۔
۷۷۔ تے جیکر تُسِیں سمجھ دے پئی اہ کیہ گل ہے۔ پئی میں قربانی نُوں نہیں چاہندا پر رحم نُوں چاہناں ہاں۔ تاں تُسِیں بے گناہیاں اُتے الزام نہ لاندے۔
۸۸۔ کیوں جو ابن آدم سبت دا خداوند ہے۔
۹۹۔ تےاُتھوں ٹُر کے اُہ اُہناں دے عبادت خانے وچ گیا۔
۱۰۱۰۔ تے ویکھو اک آدمی سی جہدا ہتھ سُکیا ہویا سی۔ تےاُہناں ایس مطلب نال پئی اُہدے اُتے عیب لان اِہ آکھ کے اُہدے کولوں پُچھیا۔ سبت دے دن آدمی نُوں ول کرنا رواہے ؟
۱۱۱۱۔ تے اوس اُہناں نُوں آکھیا پئی تُہاڈے وچوں اجہیا کہڑا آدمی ہے جہدے کول اک بھیڈ ہووے تے اُہ سبت دے دن ٹوئے وچ ڈگ پوئے۔ اُہ اُہنُوں پھڑ کے نہ کڈھے گا ؟
۱۲۱۲۔ سو آدمی بھیڈ نالوں کِنّاودھ چنگا ہے۔ ایس لئی سبت دے دن بھلا کرنا روا ہے۔
۱۳۱۳۔ تد اُہ اوس آدمی نُوں آکھن لگا۔ اپنا ہتھ ودھا۔ تے اوس ودھایا تے اُہ دوجے وانگر پھیر ول ہو گیا۔
۱۴۱۴۔ تد فریسیاں باہر جاکے اُہدے خلاف صلاح کیتی پئی اُہنُوں کس طرح مار سُٹیے۔
۱۵۱۵۔ تے یِسُوع اِہ سمجھ کے اوتھوں ٹُرگیا۔ تے بہت سارےلوک اُہدے مگر ٹُر پئے۔ تے اوس اُہناں سبھناں نُوں وَل کِتیا۔
۱۶۱۶۔ تے اوس اُہناں نُوں تاکِید کِیتی پئی مینُوں مشہور نہ کرنا۔
۱۷۱۷۔ تا ں جو اِہ گل جہڑی یشعیاہ نبی دی راہیں آکھی گئی سی پوری ہووے۔
۱۸۱۸۔ پئی ویکھو میرا بندہ جہنُوں میں چُنیا۔ میرا پیارا جہدے تھوں میرا جی خوش ہے میں اپنا روح اُہدے اُتے رکھا ں گا تے اُہ غیر قوماں نُوں نیاں دی خبر کرئے گا۔
۱۹۱۹۔ اُہ نہ جھگڑا کرئے گا۔ تے نہ اُچی بولئے گا۔ تے نہ کوئی اہدی آواز چوکاں وچ سُنے گا۔
۲۰۲۰۔ مِدھے ہوئے کانے نُوں اُہ نہیں بھننے گا۔ تے دُھکھدی ہوئی سن نُوں نہیں بجھائے گا۔ جَدتوڑی اُہ نیاں دی فتح نہ کرا دیوے۔
۲۱۲۱۔ تے اُہدے ناں اُتے غَیرقَوماں آسرارکھن گئیاں۔
۲۲۲۲۔ تد اِک بد رُوح والا آدمی جہڑا اَنّھا تے گونگا سی اُہدے کول لیاندا گیا۔ تے اوس اُہنُوں ول کتیا تے اُہ گونگا بولن تے ویکھن لگ پیا۔
۲۳۲۳۔ تے ساریاں لوکاں تعجب کر کے آکھیا !اِہ داؤد دا پُتر نہیں ؟
۲۴۲۴۔ پَر فرِیسیاں سُن کے آکھیا۔ اِہ بدرُوحاں نُوں نہیں کڈھدا۔ پربدرُوحاں دے سردار بعل زبُول دی مدد نال۔
۲۵۲۵۔ تے اوس اُہناں دیاں خِیالاں نُوں بُجھ کے اُہناں نُوں آکھیا ہر اِک راج جِہدے وِچ پُھٹ پَے جاوے سواُجڑ جاندا ہے۔ تے ہر اک شہر یا گھر جہدے وچ پُھٹ پےجائے اُہ قائم نہیں رہے گا۔
۲۶۲۶۔ تے جے شیطان شیطان نُوں کڈھدا ہے۔ تاں اُہدے اپنے آپ وچ ہی پھٹ پئی ہے۔ پھر اُہدا راج کیکرقائم رہے گا۔
۲۷۲۷۔ تے جے میں بعلزبول دی مدد نال بدرُوحاں نُوں کڈھنا ہاں۔ تاں تُہاڈے پُتّرکہدی مدد نال کڈھدے نے ؟بس اوہی تُہاڈی مُنصفی کرن گے۔
۲۸۲۸۔ پر جے مَیں خدادے روح نال بد رُوحاں نُوں کڈھناں ہاں۔ تاں تے خدا دی بادشاہی بے شک تہاڈے کول آپہنچی ہے۔
۲۹۲۹۔ یا کوئی کسے زور اور آدمی دے گھر وچ کس طرح اندر وڑ کے اُہدا مال لُٹ سکدا ہے۔ جے پہلاں اُہ اوس زوراور نُوں بنھ نہ لے۔ تے تد اُہدا گھر لٹُے گا۔
۳۰۳۰۔ جہڑا میرےنال نہیں میرے بر خلاف ہے تے جہڑا میرے نال اکٹھا نہیں کردا سو کھلار دا ہے۔
۳۱۳۱۔ ایس لئی میں تہانُوں آکھنا ہاں پئی ہر اک گناہ تے کُفر آدمیاں نُوں بخشیا جائے گا پر اُہ کفر جہڑا کوئی رُوح دے حق وچ ہووے بخشیا نہ جائے گا۔
۳۲۳۲۔ تے جہڑا کوئی ابن آد م دے برخلاف کوئی گل کرے اُہ اُہنُوں بخشیا جائے گا۔ پر جہڑا پاک روح دے بر خلاف بولے اُہنُوں بخشیا نہ جائے گا۔ نہ ایس جہان وچ نہ اگلے جہان وچ۔
۳۳۳۳۔ یا تے رُکھ نُوں چنگا آکھو تے اُہدے پھل نُوں وی چنگا۔ یا رکھ نُوں ماڑا آکھوتے اہدے پھل نُوں وی ماڑا۔ کیوں جو رکھ اپنے پھل تھوں پچھانیا جاندا ہے۔
۳۴۳۴۔ سپاں دے بچیو تُسِیں بُرے ہو کے کس طرح چنگیاں گلاں کر سکدے ہو۔ کیوں جو جہڑا من وچ بھرا ہویا ہے منہ اُتے آوندا ہے۔
۳۵۳۵۔ کھرا آدمی اپنے کھرے خزانے وچوں کھریاں گلاں کڈھدا۔ تے بُرا آدمی بُرے خزانے وچوں بُریاں گلاں کڈھدا ہے۔
۳۶۳۶۔ پرمیں تہانُوں آکھناں ہاں پئی ہر اک وادھی جہڑی لوکی بولن گے عدالت دے دن اُہ اُہدا حساب دین گے۔
۳۷۳۷۔ کیوں جو تُوں گلاں تھوں سچاتے اپنیاں گلاں تھوں مجرم ٹھیرایا جائیں گا ۔
۳۸۳۸۔ تد بعضیاں فقیہاں تے فریسیاں اُہنُوں جواب دے کے آکھیا اَے اُستاد اسیں تیتھوں کوئی نِشان ویکھنا چاہنے ہاں۔
۳۹۳۹۔ پراوس اُہناں نُوں جواب دِتّا پئی بُرےتے زناکار لوک نِشان لبھدے نے۔ پر اُہناں نُوں کوئی نِشان دِتّا نہ جائے گا۔ بناں یونس نبی دے نشان دے۔
۴۰۴۰۔ کیوں جو جس طرح یونس تن رات دن مچھی دے ڈھڈھ وچ رہیااوسے طرح اِبن آدم تن رات دن زمین دے اندر رہے گا۔
۴۱۴۱۔ نینوے د ے لوک عدالت وچ ایس زمانے دےلوکاں نال اُٹھن گے تے اہناں نُوں مجرم ٹھہران گے کیوں جو اُہناں یونس دی مُنادی سُن کے توبہ کر لئی۔ تے ویکھو یونس نالوں اِتھے اک وڈّا ہے۔
۴۲۴۲۔ دکھن دی رانی ایس زمانے دیاں لوکاں نال عدالت دے دن اُٹھے گی۔ تے اُہناں نُوں مجرم ٹھیرائیگی۔ کیوں جو اُہ تے سلیمان دی دانائی سُنن لئی زمین دیاں حداں تھوں آئی تے ویکھو ایتھے سلیمان نالوں بھی اِک وڈّا ہے۔
۴۳۴۳۔ پلیت روح جد آدمیوں باہر نکل گئی ہووے تاں سُکِیاں تھانواں وچ آرام لبھدی پھر دی ہے۔ پر نہیں پاندی۔
۴۴۴۴۔ تدآکھدی ہے میں اپنے گھر نُوں جتھوں نکلی ساں مُڑ جاں گی۔ تے آکے اُہنُوں وِہلا تے جھاڑیا سنواریا ہویا ویکھدی ہے۔
۴۵۴۵۔ تد اُہ جاندی ہے تے ہور ست(۷) رُوحاں اپنے نالوں بُریاں نال لیاوندی ہے تے اُہ وچ وڑکے اوتھے وسدیاں نے۔ تے اوس شحض دا پچھلا حال پہلے نالوں بھیڑا ہو جاندا ہے۔ ایس بُرے زمانے دے لوکاں دا بھی اہو جہیا حال ہووئے گا۔
۴۶۴۶۔ اجے اُہ لوکاں نال گلاں پیا کردا سی تاں ویکھو اُہدی ماں تے بھرا باہر کھلوتے ہوئے اُہدے نال گل کرنی چاہندے سان۔
۴۷۴۷۔ تے کسے اہنُوں آکھیا ویکھ تیری ماں تے بھرا باہر کھلوتے ہوئے نے تے تیرے نال گل کرنی چاہندے نے۔
۴۸۴۸۔ پر اوس دسّن والے نُوں جواب دِتا کون ہے میری ماں تے کون میرا بھرا۔
۴۹۴۹۔ تے اپنے شاگرداں ول اپنا ہتھ کر کے آکھیا۔ ویکھو میری ماں تے میرے بھرا۔
۵۰۵۰۔ کیوں جو جہڑاکوئی میرے باپ دی جہڑا اَسماناں وچ ہے مرضی نُوں پورا کردا ہے اُہوہے میرابھر ا تے بہن تےماں۔